Ստեփան Զորյանի գրական հայացքները

Ստեփան Զորյանի գեղարվեստական ստեղծագործությունն արժևորած գրականագետները նրա գրականագիտական, քննադատական հարուստ ժառանգությանն անդրադարձել են միայն իրենց ուսումնասիրությունների թելադրած անհրաժեշտությամբ։

Սույն մենագրության էջերում համակողմանիորեն քննության են առնվում գրողի գրեթե բոլոր գրականագիտական ու քննադատական ելույթները, հուշ-դիմանկարները, հայ և օտար դասականների ու ժամանակակիցների երկերի բովանդակության, գեղարվեստական արժանիքների, լեզվի ու ոճի, գրականության տարաբնույթ խնդիրների մասին նրա բանավիճային հոդվածները, խոհերն ու նկատողությունները, որոնք այսօր էլ կենսունակ և ուսանելի են գրական սերունդների համար։