Օտարականը․ թատերգութիւն հայ հեթանոսական շրջանէն, մէկ պատկեր եւ չորս արարուած

“Օտարականը” թատերգութեան նիւթը առնուած է Հայոց Պատմութենէն, որու համաձայն Յիսուսի վարդապետութիւնը մուտք գործեց Հայաստան, սկսելով առաջին դարէն եւ առաջ բերաւ ընկերային հսկայ յեղաշրջում եւ նոր կրօնքին առաջին զոհը կամ նահատակը եղաւ Սանդուխտ՝ սպանուած իր հօր, Սանատրուկ թագաւորին հրամանով։

Թատերգութեան մէջ “Սանատրուկ” եւ “Սանդուխտ” գործածուած են իբր տիտղոս, ոչ թէ յատուկ անուն։ “Սահնա” կամ “Սահնէ” - մէկը՝ արիական հին բառերէն - հաւանաբար կը նշանակէ “Արեւ”, որով՝ Սահնա-Դուխտ, Արեւի Դուստր եւ Սահնա-Տրուկ՝ Արեւի-Տուրք կամ Արեւորդի։