Յուշամատեան Սրբ․ Գրիգոր Լուսաւորիչ մայր տաճարի

Այնպիսի շրջանի մը ուր անստուգութիւնը կ՝իշխէ համատարած, ուր հոգեւոր ու բարոյական դարաւոր սկզբունքներն իսկ կը տատանին իրենց հիմերուն վրայ, եւ մարդկութիւնը խարխափելով կը յառաջանայ կեանքի մութ բաւիղէն, ո՜րքան սփոփարար է տեսնել թէ հաւատքի ջահ մը կը վառի փոքր ժողովուրդի մը փոքր մէկ գաղութին մէջ։ Տաճա՜ր մը կը բացուի ահա, որուն հովանիին ներքեւ պէտք է որ սրբութիւնները պահպանուին, հաւատքը գործօն դառնայ, հայրերն ու մայրերը մխիթարուին ու զաւակները ուռճանան։

Տա՜ր Աստուած որ այս Տունը լուսոյ վառարան մը ըլլար մտքի ու հոգիի, եւ առաջնորդէր մեծերն ու փոքրերը սիրոյ եւ հաւատքի ուղիէն, որպէսզի կարենային կոչել զԱստուած “Հայր”։

Թո՜ղ Հայը Հա՜յ մնայ, հաւատացեալ ու լուսամիտ, այս Տան մէջ, ու այս Տան շնորհիւ։