Հայոց պատմություն․ հանրակրթական դպրոցի 5-րդ դասարանի դասագիրք

Պատմությունը ժողովրդի կենսագրությունն է։ Ազգային պատմությունը բացահայտում է ժողովրդի առաջացման ժամանակը, աշխարհագրական միջավայրը, անցած պայքարի ու ստեղծագործ աշխատանքի դարավոր ուղին։ 

Հայ ժողովրդի հետ հարևանությամբ ապրող շատ ժողովուրդներ չեն դիմացել պատմության վայրիվերումներին, ժամանակի քննությանը, վերացել են, այժմ գոյություն չունեն։ Մեր ժողովուրդը համառ ու տևական պայքարի միջոցով կարողացել է դժվարագույն պայմաններում գոյատևել։ Նա մշտապես մաքառել է ազատության ու անկախության համար։ Դրանով է պայմանավորված այն հանգամանքը, որ հայ գրականությունը, արվեստը և մշակույթն առհասարակ լեցուն են ազատագրական պայքարն արտացոլող գործերով։