Լրաբեր Պոլսահայ պատրիարքութեան, I 25, 10 հոկտեմբեր 1996

Ըստ Հայ Եկեղեցւոյ տօնացոյցին ամրան եղանակին կը յիշատակուին հայ տառերու գիւտին եւ թարգմանչական շարժումին զոյգ ռահվիրաները՝ Ս․ Սահակ Պարթեւ Հայրապետն ու Ս․ Մեսրոպ Մաշտոց Վարդապետը։ Իսկ աշնան այս օրերուն կը յիշատակուին Ս․ Մեսրոպ Մաշտոցն ու Հայ Եկեղեցւոյ երախտաւորեալ սուրբերը՝ Եղիշէն, Մովսէս Քերթողը, Դաւիթ Անյաղթ Փիլիսոփան, Գրիգոր Նարեկացին, Ներսէս Շնորհալին եւ այլ սուրբ Վարդապետներ։ Մեր եկեղեցական օրացոյցները յատկապէս կը յիշեցնեն, թէ այս տօնը յիշատակութիւնն է Հայ տառերու գիւտին եւ այս տօնակատարութեամբ կը սկսի աւանդական Հայ Մշակոյթի Շաբաթը զանազան մշակութային միջոցառումներով։