Գրագէտ Մալխասի կեանքն ու գործը

Սփիւռքի գրականութեան մէջ Մալխաս հանրածանօթ անուն մըն է։ Կարելի է ըսել՝ ամենէն ժողովրդական եւ փնտռուած գրողն է ան, որուն գործերը թարմ ու բուրումնաւէտ հացի սպառում ունեցան, ձեռքէ ձեռք խլուելով։ Այսօր դժուար է գտնել ազգային կրթութեան եւ ոգիի տէր պատանի մը, որ “Զարտօնքն”ներու շարքը կարդացած չըլլայ։ Ոչ միայն պատանիները, այլ նաեւ հասակը առած ընթերցողներու ստուարաթիւ բազմութիւններ պատանեկան յափշտակութեամբ կը կարդան Մալխասի վէպերը։