Մայիս 28, 1918-1938 քսանամեակ

"Ճիշդ քսան տարի առաջ մեր հայրենիքին մէջ տեղի ունեցան դէպքեր, որոնք հիմնովին շրջեցին Հայոց պատմութեան ընթացքը։ Մեր դարաւոր թշնամին յանկարծակիի բերելով Հայ հրամանատարութիւնը գրաւեց Ալեքսանդրապոլը (Շիրակ), եւ արդէն կը մօտենար Հայաստանի սրտին՝ Երեւանին եւ Էջմիածնին։ Հայ ժողովուրդը կ՝ապրեր ճակատագրական օրեր։ Հարուած մը եւս եւ հայ ժողովուրդը պիտի ոչնչանար ֆիզիքապէս։ Այդ բախտորոշ օրերուն յեղափոխական վճռականութեամբ ասպարէզ իջաւ անմոռանալի Արամը, որ օր եւ գիշեր աշխատելով կազմակերպեց համաժողովրդական դիմադրութիւնը։

Արարատեան դաշտի հայութիւնը մէկ մարդու պէս ոտքի կանգնեցաւ։ Գործի անցան բոլորը։"