Խինդ ու ժպիտ․ հատընտիր էջեր երգիծանքի եւ ծիծաղի, հայ եւ օտար վարպետներէն

Երգիծական նիւթերով այնքան հարուստ այս հատորի հրատարակութեան նպատակն է խնդացնել իր ընթերցողները։ Այլ խօսքով, պարգեւել անոնց խինդ ու ժպիտի երջանկութիւնը, որուն պահանջը ունի ամէն մարդ, իր առօրեայ կեանքի ընթացքին։ Այս է պատճառն ալ, որ նոյն այդ կեանքին մէջ ամէնէն աւելի փնտռուած են զուարթախոհ, սրամիտ, պատրաստախօս, կատակաբան ու շէնշող մարդիկը, որոնք խնդացնել, զուարճացնել եւ ուրախ տրամադրութիւն ստեղծել գիտեն։ Քիչերուն տրուած է անշուշտ այս շնորհը, բայց նման յատկութիւն ունեցող մէ՜կ մարդ կարող է հազարաւորներու ընծայել խնդալու պատեհութիւնը եւ գոհացնելու զանոնք իր անսպառ սրախօսութիւններով, կատակներով ու քաշքշուքներով։