Կիւլիվըրի ճամբորդութիւնները

Հայրս քիչ մը հող ունէր Նաթինկէմշայրի մէջ։ Երբ տասնըչորս տարեկան եղայ, զիս Քէմպրիճի բարձրագոյն վարժարաններէն մէկը ղրկեց, որպէսզի ուսումս հոն շարունակեմ։

Դպրոցին ծախքերը շատ քիչ էին, սակայն, նորէն ալ՝ հինգ զաւակներու տէր համեստ ընտանիքի մը երեք մանչ զաւակներէն մէկը ըլլալուս համար չկրցայ վերջը բերել եւ հազիւ երեք տարի կրցայ կարդալ։ Անկէ վերջ ալ, չորս տարի իբրեւ օգնական աշխատեցայ Ճէյմս Պէյց անուն փորձառու վիրաբոյժի մը մօտ։ Հայրս երբեմն ինծի փոքրիկ գումարներ կը ղրկէր՝ մանրումունր ծախքերս հոգալու համար, իսկ ես այդ դրամները կը գործածէի զանազան գիրքեր գնելու՝ ճամբորդական եւ աշխարհագրական գիտելիքներ ամբարելու համար շարունակ։