Փոքրիկ իշխանուհին

Ձմեռնային մռայլ ու թախծոտ օր մըն էր։ Լոնտոն մշուշներու մէջ թաղուած էր եւ քաղաքին լայն պողոտաներէն մէկուն վրայ կառք մը կը յառաջանար դանդաղ, մինչ կառքին մէջ աղջնակ մը հօրը քովիկը կծկտած՝ խոշոր, խորունկ աչքերով և մտածկոտ ու հետաքրքիր ակնարկներով բոլորտիքը կը դիտէր։

Իր տարիքէն մեծ աղջիկներու վայել էր այս նայւածքը, տասը-տասներկու տարեկաններուն նուազագոյն, մինչդեռ Սառա, հազիւ թէ եօթը տարեկան կար տակաւին։