Արեւելեան ողբերգութիւնը Աթէնքէն Էնկիւրի

Լոյտ Ճօրճ, պետական մարդը, զուրկ չէ փոփոխական խառնուածքէ։ Իբրեւ յանդուգն մտածող, դրական եւ յաջող կարգադրող մը, իր երկրին մէջ մասնաւոր տեղ մը ունի և փայլուն կերպով աշխատած է հայրենիքին համար, իրականութեանց գետնին վրայ։ Անիկա, յաջս արեւելքցիներու, եւրոպական արժանապատուութիւնը անգոսնելու աստիճան անգլիացի մըն է որ նոյնիսկ Եւրոպայի խիղճը կրնար ներկայացնել - եթէ իսկապէս եւրոպական խիղճ մը գոյութիւն ունի - եթէ, հնարքէ կամ հարկադրանքէ մղուած՝ կղզիներու շահը ամէն բանի գերադասած չըլլար։