Ուղեցույց Սուրբ Էջմիածնի մայրավանքի

Սուրբ Էջմիածնի Մայր տաճարը կառուցվել է 301-303 թվականներին՝ ի նշանավորումն Հայաստանում քրիստոնեության ընդունման իբրև պետական կրոն։

 Այն ժամանակ Վաղարշապատը (ներկայիս Էջմիածին քաղաքը) Արշակունի հայ թագավորների մայրաքաղաքն է եղել։ Կառուցելով տաճարը մայրաքաղաքում, ս․ Գրիգոր Լուսավորիչը հաստատել է այնտեղ իր հայրապետական Աթոռը։ 

Այժմյան սուրբ Էջմիածնի տաճարի տեղում հեթանոսական շրջանում եղել է մեհյան։ Դա ապացուցվում է այն կրակարանով, որը հայտնաբերվեց Մայր տաճարի Ավագ սեղանի տակ 1958 թվականին կատարված պեղումների ժամանակ։