Հովհաննես Այվազովսկի

Այվազովսկի և ծով։ Սերունդների գիտակցության մեջ այս ըմբռնումներն ասես նույնացել են։ Խոր ու բանաստեղծական ճշմարտությամբ Այվազովսկին պատկերել է ծովը, երգել մարդու հավիտենական սերը բնության ու կյանքի նվիրական գաղափարն իր մեջ կրող կապույտ, անսահման տարերքի նկատմամբ։

Քիչ է, սակայն, ի դեմս Այվազովսկու միայն մեծատաղանդ ծովանկարիչ տեսնել։ Իր լավագույն գործերում, ինչպես ամեն մի մեծ նկարիչ, Այվազովսկին բացահայտել է իր ներաշխարհը, մարմնավորում տվել ժամանակի շնչով ապրող իր ոգուն։

“Ապրել՝ ինձ համար նշանակում է աշխատել”։ Հավատարիմ իր դավանանքին՝ նա, ասես, մրցման ելավ երևակայության հետ, ստեղծելով շուրջ վեց հազար պատկեր։