Մեկնութիւն քերականի

“Մեկնութիւն քերականի” աշխատությունը Վարդան Արևելցու մատենագրական ժառանգության արժեքավոր երկերից է, որն ստեղծվել է, իբրև արքայական պատվեր, 1244-1246 թվականներին՝ Կիլիկիայում, Հեթում Ա թագավորի խնդրանքով։ Որպես քերականական դասընթացի ձեռնարկ այն բազմացվել է մի շարք ընդօրինակություններով և լայն կիրառություն է գտել ինչպես Կիլիկյան Հայկական թագավորության տարածքի վարդապետարաններում, այնպես և պատմական Հայաստանի ուսումնագիտական կենտրոններում։

Վարդան Արևելցու սույն աշխատությունը, համապատասխան ուսումնասիրությամբ ու ծանոթագրություններով, առաջին անգամ գիտական շրջանառության մեջ է դրվում իբրև քննական բնագիր՝ պատրաստված 17 ձեռագրերի համադրական համեմատության հիման վրա։