Պատմա-բանասիրական հետազոտություններ

Գիտության վաստակավոր գործիչ, բանասիրական գիտությունների դոկտոր-պրոֆեսոր Երվանդ Գալուստի Տեր-Մինասյանի աշխատությունների սույն ժողովածուն հրատարակվում է հեղինակի ծննդյան 90 և գիտա-մանկավարժական գործունեության 70-ամյակի առթիվ։

Իր բազմամյա գիտա-մանկավարժական գործունեության ընթացքում պրոֆ․ Ե․Գ․ Տեր-Մինասյանը հրատարակել է պատմնա-բանասիրական բազմաթիվ հոդվածներ, որոնք ցրված են ամսագրերի ու պարբերականների էջերում։ Ներկա ժողովածուն ընդգրկում է հեղինակի տարբեր ժամանակներում (1907-1964) գրած մի շարք հոդվածները, որոնք մի կողմից՝ պատկերացում են տալիս նրա անցած ուղու մասին և մյուս կողմից՝ իրենց առաջադրած ու քննարկած հարցերով որոշակի հետաքրքրություն են ներկայացնում արդի բանասիրության համար։